ایف اے ٹی ایف پر بھارت اور اپوزیشن ایک پیج پر ہیں،وزیراعظم

وزیراعظم عمران خان نے کہا ہے کہ فنانشل ایکشن ٹاسک فورس(ایف اے ٹی ایف) سے متعلق امور میں اپوزیشن جماعتیں اور بھارت ایک پیج پر ہیں۔اسلام آباد میں وزیراعظم کی زیر صدارت حکومتی اور پارٹی ترجمانوں کا اجلاس ہوا۔اجلاس سے خطاب میں عمران  خان نے کہا کہ جمہوریت میں اپوزیشن کا ملک کے لیے اہم کردار ہوتا ہے لیکن ایف اے ٹی ایف کے معاملے پر بھارت اور اپوزیشن جماعتیں ایک پیج پر ہیں۔انہوں نے کہا کہ بھارت کی پوری کوشش ہے کہ پاکستان ایف اے ٹی ایف کی بلیک لسٹ میں شامل ہوجائے، اپوزیشن نے حکومت کو بلیک میل کرنے کے لیے اس حوالے سے قانون سازی روکی۔وزیراعظم نے کہا کہ اپوزیشن ذاتی مفادات کو قومی مفاد پرترجیح دے رہی ہے، وہ صرف اپنی کرپشن بچانے کے لیے ملک کو نقصان پہنچارہی ہے، وہ اینٹی منی لانڈرنگ قانون میں اپنے مفاد کی ترامیم چاہتی ہے۔عمران خان نے ترجمانوں کو ہدایت کی کہ وہ ایف اے ٹی ایف کی قانون سازی روکنے پر اپوزیشن کے کردار کو قوم کے سامنے رکھیں۔