کراچی کی ضلعی حکومت مضبوط کرنے سے متعلق آئینی ترمیم ہونی چاہیے: خواجہ آصف

0

مسلم لیگ ن کے رہنما خواجہ آصف کا کہنا ہےکہ پیپلزپارٹی کا کابینہ میں شامل ہونا اچھا شگون ہوگا، ذمہ داریاں تقسیم ہوجائیں گی، کراچی کی ضلعی حکومت مضبوط کرنے سے متعلق آئینی ترمیم ہونی چاہیے۔

پارلیمنٹ ہاؤس میں صحافیوں سےگفتگو کرتے ہوئے  خواجہ آصف کا کہنا تھا کہ اگر تین بڑی جماعتیں کابینہ کا حصہ بنیں تو  ذمہ داریاں تقسیم ہوجائیں گی، تین بڑے صوبوں سے سیاسی جماعتیں ہوں گی تو کابینہ اچھی ہوجائےگی،کابینہ کا سائز  بڑا نہیں ہونا چاہیے۔

 خواجہ آصف کا کہنا تھا کہ تعلیم  اور صحت جیسی وزارتیں صوبوں کو منتقل ہونی چاہئیں، 10 سے 12 وزارتیں صوبوں کو منتقل کرنےکی بلاول کی تجویز کی حمایت کرتا ہوں، ضلعی حکومتیں مضبوط کرنے سے اسمبلی ممبران کا بوجھ کم ہوگا، کراچی کی ضلعی حکومت مضبوط کرنے سے متعلق آئینی ترمیم ہونی چاہیے، کراچی بڑا شہر ہے، دنیا میں بڑے شہروں میں مضبوط مقامی حکومتیں ہیں۔

ان کا کہنا تھا کہ مجھے پارٹی نے پارلیمانی لیڈر نامزد کیا ہے جو  وزارت  سے بڑا عہدہ ہے، حکومت چلانے سے متعلق اتحادیوں کے بھی اتنے ہی اسٹیک ہیں جتنے ہمارے، اگر حکومت فیل ہوجائے تو اتحادیوں کو  بھی اتنا ہی نقصان ہوتا ہے، شہبازشریف نےکل قابل عمل معاشی ایجنڈا دیا ہے، شہباز شریف نے ایک کروڑ  نوکریوں، 50 لاکھ گھر  اور کٹے مرغیوں  والا ایجنڈا نہیں دیا، شہبازشریف نے سائیکل پر  آنےکا دعویٰ بھی نہیں کیا اور نہ ہی گورنر ہاؤسز کو  یونیورسٹیاں بنانےکا دعویٰ کیا ہے۔

رہنما ن لیگ کا کہنا تھا کہ پی ٹی آئی آج  جو فلور  پرمطالبہ کر رہی ہے،4 سال پہلے ہم یہی مطالبہ کرتے  رہے، اس وقت نہ پی ٹی آئی نہ جواب دیتی تھی نہ ان کا وزیراعظم ایوان میں آتا تھا، ہنسی آتی ہے، وہ لوگ مطالبے کرتے ہیں جنہوں نے پانچ پانچ جماعتیں تبدیل کی ہیں۔

خواجہ آصف نےکہا کہ ایوب خان کی 1947 میں کرپشن کی انکوائری کی گئی تھی، انکوائری کے بعد ایوب خان کو بارڈر سے مشرقی پاکستان ٹرانسفر کردیا گیا تھا، ایوب خان نے فاطمہ جناح کو کراچی میں ہرا کر قتل عام کیا، عمر ایوب کل تک نواز شریف اور  شہباز شریف کے نعرے لگایا کرتا تھا، آج وہ پی ٹی آئی کا لیڈر  ہے جب کہ وفادار  لیڈر موجود ہیں جو سائیڈ پر ہیں۔

ایک سوال پر ان کا کہنا تھا کہ پارٹی کی قیادت اور فیصلے نواز شریف ہی کریں گے، یہ امکان بھی ہےکہ نوازشریف کو پارٹی صدارت دے دی جائے۔

You might also like
Leave A Reply

Your email address will not be published.