ویب رپورٹ
ریکودک مائننگ کمپنی (آر ڈی ایم سی) کی معاونت سے انڈس اسپتال اور ہیلتھ نیٹ ورک (آئی ایچ ایچ این) نے ہمئے گاؤں میں صحت عامہ سے متعلق آگاہی اور اسکریننگ مہم کا آغاز کیا ہے۔
یہ گاؤں ریکودک منصوبے کے قریب ترین کمیونٹی ہے اور اس مہم کا مقصد ٹی بی، ہیپاٹائٹس بی اور سی کے بارے میں آگاہی فراہم کرنا اور ان بیماریوں کے لیے مفت اسکریننگ فراہم کرنا ہے۔
مہم کا مقصد کمیونٹی کو ان بیماریوں کے خطرات، علامات اور ان سے بچاؤ کے طریقوں کے بارے میں آگاہ کرنا ہے۔
آئی ایچ ایچ این کی ٹیمیں مقامی ہیلتھ ورکرز کے ساتھ مل کر آگاہی سیشنز منعقد کر رہی ہیں، جن میں ہیپاٹائٹس بی ویکسینیشن کی اہمیت، غیر جراثیم کش طبی آلات کے استعمال کے خطرات اور غیر محفوظ خون کی منتقلی کے خطرات پر روشنی ڈالی جا رہی ہے۔
اس کے علاوہ، نظامِ تنفس کی صحت، مناسب وینٹیلیشن اور ٹی بی کے علاج کے طریقوں پر بھی زور دیا جا رہا ہے تاکہ اس بیماری کے پھیلاؤ کو روکا جا سکے۔
اس مہم میں ایک خاتون شرکاء نے اپنی رائے کا اظہار کرتے ہوئے کہا: “ہم نے کبھی نہیں سوچا تھا کہ ہیپاٹائٹس یا ٹی بی سنگین مسائل ہیں۔
آج ہمیں یہ سمجھ آ گئی ہے کہ ہم اپنے اور اپنے خاندان کو کیسے محفوظ رکھ سکتے ہیں۔
یہ پروگرام جلد ہی تحصیل نوکنڈی اور چاغی کے دیگر دور دراز علاقوں تک پھیلایا جائے گا تاکہ ان علاقوں کے لوگوں کو بہتر صحت کی سہولتیں فراہم کی جا سکیں۔
اس اقدام کے تحت آئی ایچ ایچ این کی کمیونٹی انگیجمنٹ اور ایجوکیشن ٹیم نے کلی مینگل آباد کے ایک اسکول میں بھی صحت کے بارے میں آگاہی سیشن منعقد کیا، جس میں 200 سے زائد طلباء شریک ہوئے۔
اس سیشن میں بیماری کی روک تھام اور صفائی کے بارے میں بات کی گئی اور طلباء کو متحرک سرگرمیوں کے ذریعے اپنے خاندانوں میں یہ معلومات شیئر کرنے کی ترغیب دی گئی۔
اسکریننگ کے دوران شناخت شدہ کیسز کو قریبی اسپتالوں میں علاج کے لیے بھیجا جائے گا تاکہ انہیں بروقت طبی دیکھ بھال فراہم کی جا سکے۔
یہ مہم آر ڈی ایم سی کے صحت مند اور مضبوط کمیونٹیز کی تعمیر کے عزم کو اجاگر کرتی ہے اور چاغی اور اس کے گرد و نواح میں پائیدار ترقی کے لیے مضبوط بنیاد فراہم کرتی ہے۔
آر ڈی ایم سی مقامی کمیونٹیز کو دیرپا سماجی و اقتصادی فوائد فراہم کرنے کے لیے ذمہ دارانہ کان کنی کے ذریعے طویل المدتی ترقی کا عزم رکھتا ہے۔