وفاقی حکومت اب ختم ہونے والی ہے: مولاناواسع

کوئٹہ : جمعیت علما اسلام بلوچستان کے صوبائی امیر مولانا عبدالواسع نے کہا ہے کہ وفاقی حکومت اب ختم ہونے والی ہے ، حکمران عوام کو اب ریلیف دینے کی بجائے خود کو ریلیف دینے کی کوششوں میں ہیں ، وقت بدل رہا ہے اور سلیکٹڈ وزیراعظم کے خلاف تحریک عدم اعتماد ضرور کامیاب ہو گی ، جمعیت علما اسلام دیگر اپوزیشن جماعتوں کے ساتھ ملکر آئندہ کا لائحہ عمل طے کرے گی ۔ ان خیالات کا اظہار انہوں نے جمعیت علماءاسلام کے عہدیداروں سے بات چیت کرتے ہوئے کیا ۔

انہوں نے کہا کہ جمعیت علما اسلام نے ہمیشہ بلوچستان کے وسائل کا دفاع کیا ہے ،گزشتہ دنوں وفاقی حکومت نے جس طریقے سے سیندک کے معاملے پر ایک بار پھر بلوچستان حکومت کو نظر انداز کر کے متعلقہ کمپنی سے جس طرح معاہدہ کیا اور اٹھاریں ترمیم کو بائی پاس کیا ہے اس پر ہم خاموش نہیں رہیں گے کیونکہ وفاقی حکومت بار با ر صوبائی معاملات میں مداخلت کر کے اٹھارویں ترمیم کو نظر انداز کر رہی ہے اور صوبائی حکومت کو بھی اس حوالے سے اپنا احتجاج کرنا چاہیے ۔

انہوں نے کہا کہ جمعیت علما اسلام اپوزیشن جماعتوں کو اعتماد میں لیکر اس حوالے سے آئندہ کا لائحہ عمل طے کریگی کیونکہ وفاق آئی ایم ایف کے قرضے بلوچستان کے وسائل سے ادا کرنے کی کوشش کر رہے ہیں جس کی ہم کسی بھی صورت اجازت نہیں دینگے بلوچستان کے وسائل پر سب سے پہلے یہاں کے عوام کا حق ہے اور عوام کے حقوق پر سودا بازی نہیں کرینگے وفاقی حکومت پوری طورپر اپنے فیصلے پر نظر ثانی کریں اور اس طرح معاہدات نہ کریں جس سے کل ان کو مشکلا ت کا سامنا ہو اپوزیشن جماعتیں بھی اس سلسلے میں اپنا کردار ادا کریں۔