جنگی جنون میں مبتلا نیتن یاہو کا یرغمالیوں کی رہائی کیلئے حماس کی شرائط ماننے سے انکار

0

جنگی جنون میں مبتلا اسرائیلی وزیراعظم بن یامین نیتن یاہو نے یرغمالیوں کی رہائی کے بدلے حماس کے شرائط ماننے سے انکار کردیا ہے۔

اپنے ایک بیان میں اسرائیلی وزیراعظم نے کہا کہ ہم پر اندرونی اور بیرونی دباؤ ہے کہ اپنے مقاصد حاصل کیے بنا ہی جنگ ختم کریں اور کسی بھی قیمت پر یرغمالیوں کی رہائی کا معاہدہ کرلیں لیکن ہم یرغمالیوں کی رہائی کیلئے حماس کے شرائط نہیں مان سکتے۔

نیتن یاہو کا کہنا تھا کہ حماس کے شرائط مان کر  یرغمالیوں کو واپس لانے کا مطلب ہوگا کہ اسرائیلی ریاست نے حماس کے سامنے اپنی شکست قبول کر لی۔

اسرائیلی ریڈیو سے بات کرتے ہوئے اسرائیلی وزیر بیزلیل سیموٹریک نے کہا کہ نیتن یاہو نے واضح کردیا ہے کہ ہم اسرائیلی یرغمالیوں کی رہائی کی کوئی قیمت ادا نہیں کریں گے۔

سیموٹریک نے کہا کہ اسرائیلی وزیر اعظم کیلئے بھی یرغمالیوں کی رہائی بہت اہم ہے لیکن اس کیلئے کوئی قیمت ادا نہیں کی جائے گی بلکہ غزہ پر فوجی دباؤ بڑھاتے ہوئے حماس کو شکست دیکر تمام  یرغمالیوں کو رہا کروایا جائے گا۔

واضح رہے کہ اسرائیلی وزیراعظم کا یہ بیان جنگ بندی اور یرغمالیوں کی رہائی سے متعلق مذاکرات میں پیشرفت کیلئے امریکی نمائندہ خصوصی برائے مشرق وسطیٰ کے دورے سے قبل سامنے آیا ہے۔

You might also like
Leave A Reply

Your email address will not be published.