ڈپٹی کمشنر گوادر، حمود الرحمن کی خصوصی دلچسپی اور اقدامات کے نتیجے میں ضلع بھر میں تعلیمی نظام کو بہتر بنانے اور تعلیم کو عام کرنے کی کوششیں تیز کر دی

گوادر،   : ڈپٹی کمشنر گوادر، حمود الرحمن کی خصوصی دلچسپی اور اقدامات کے نتیجے میں ضلع بھر میں تعلیمی نظام کو بہتر بنانے اور تعلیم کو عام کرنے کی کوششیں تیز کر دی گئی ہیں۔ ان اقدامات کے تحت غیر فعال اسکولوں کو فعال بنانے کے اہم اقدامات اٹھائے جا رہے ہیں، جس کا مقصد مقامی بچوں کو معیاری تعلیم فراہم کرنا ہے۔

آج ابتدائی طور پر 17 اسکولوں کو ہنگامی طور پر فعال کرنے کے لیے اہم اقدامات کیے گئے۔ اس عمل کی قیادت ایڈیشنل ڈپٹی کمشنر (ریوینیو) سر بلند خان نے کی، جبکہ محکمہ تعلیم کے ڈسٹرکٹ ایجوکیشن آفیسر زائد علی اور ڈسٹرکٹ فیمل ایجوکیشن آفیسر بلقیس قادر نے بھی اہم کردار ادا کیا۔عارضی بنیادوں پر مختلف یونین کونسلوں سے آئے ہوئے سینکڑوں میل اور فیمل امیدواروں کے انٹرویوز کیے گئے۔ ان انٹرویوز کے دوران امیدواروں کی تعلیمی صلاحیتوں کا جائزہ لیا گیا اور شعبہ تعلیم، ریاضی ،سائنس، انگلش، اردو، مطالعہ پاکستان، اسلامیات اور جنرل نالج کے حوالے سے مختلف سوالات پوچھے گئے۔

اس اقدام کا مقصد ضلع گوادر میں تعلیمی نظام کو بہتر بنانا اور مقامی بچوں کو ان کے گھروں کے قریب معیاری تعلیم فراہم کرنا ہے۔ بلا شبہ یہ اقدام تعلیم کے شعبے میں ضلعی انتظامیہ کا ایک انقلابی قدم ہوگا، جس سے علاقے میں تعلیمی معیار میں نمایاں بہتری آئے گی۔ ڈپٹی کمشنر حمود الرحمن کی قیادت میں ضلعی انتظامیہ کی یہ کاوشیں مقامی بچوں کے مستقبل کو روشن بنانے میں اہم کردار ادا کریں گی۔ تمام والدین سے گزارش ہے کہ وہ اپنے بچوں کو ان اسکولوں میں داخل کروائیں تاکہ انہیں بہترین تعلیمی مواقع میسر آئیں۔ مزید برآں، انٹرویوز کا سلسلہ کل بھی جاری رہے گا، لہذا خواہشمند امیدواروں کو دعوت دی جاتی ہے کہ وہ شرکت کریں۔