معذور شہریوں کے خوابوں کی تکمیل کیلئے تمام وسائل بروئے کار لائیں گے‘اردگان
انقرہ ترک صدر رجب طیب اردوان نے کہا ہے کہ ہم اپنے معذور شہریوں کے خوابوں کی تکمیل کے لیے تمام وسائل بروئے کار لائیں گے۔
ترک خبررساں ادارے کے مطابق انہوں نے دارالحکومت انقرہ میں صدارتی سوشل کمپلیکس میں خصوصی تعلیمی اداروں کے لئے کھیلوں کے سامان کی تقسیم کی تقریب سے خطاب کرتے ہوئے کہا کہ ہم ملک کے ہر ضلع کو 27 ہزار 259 عدد کھیلوں کا سامان مہیا کریں گے, اس طرح ہمارے معذور شہری بھی کھیلوں میں شامل ہو سکیں گے اور مجھے یقین ہے کہ کھیل سمیت زندگی کے ہر شعبے میں کامیابیوں کی منزلیں طے کریں گے۔
انہوں نے کہا ہے کہ ٹوکیو 2020 پیرااولمپکس میں ہم نے 13 برانچوں اور 87 کھلاڑیوں کے ساتھ اپنی تاریخ کی سب سے بڑی شرکت کی۔ ہمارے کھلاڑیوں نے دنیا، یورپ اور دیگر بین الاقوامی چیمپئن شپس میں متعدد تمغے جیت کر اپنے ملک کا سر فخر سے بلند کیا ہے۔
انہوں نے کہا کہ ہم نے 2024 پیرس اولمپکس کے لئے تیاریاں شروع کر دی ہیں اور مجھے یقین ہے کہ پیرس میں ہم کھلاڑیوں کی اور تمغوں کی تعداد کے حوالے سے نئے ریکارڈ قائم کریں گے۔